تحولت زغاريد الفرح إلى صرخات مكتومة، وأضواء الزينة إلى سحب من الدخان الأسود؛ في "عزبة خير الله" بمنطقة مصر القديمة، فلم تترك النيران شيئاً سوى الرماد وذكريات مؤلمة لعروس كانت تستعد لزفافها بعد أيام قليلة، لتجد نفسها فجأة أمام جدران متفحمة وحلم ضاع في غضون دقائق بعد التهام النيران لعفشها وشقق أسرتها بالكامل .
وروت العروس المكلومة لـ"تليجراف مصر"، تفاصيل المأساة التي بددت أحلامها وكسرت فرحتها.
فرحي بعد 10 أيام وكل حاجة راحت
بدأت العروس حديثها قائلة: "كان متبقي على فرحي 10 أيام بس، كنت بعدّ الساعات علشان أروح بيتي الجديد، لكن فجأة النار أكلت كل حاجة.. الجهاز اللي جمعته في سنين، الهدوم، الفرش، والأجهزة.. مفيش حاجة فضلت، كل اللي حلمت بيه بقى رماد في لحظة".
أنا يتيمة وكنت شغالة علشان أجهز نفسي
وتستكمل العروس قصتها المأساوية، مشيرة إلى رحلة كفاحها الطويلة: "أنا يتيمة الأب، و بنزل أشتغل علشان أشيل الحمل عن أمي وأجهز نفسي بلقمتي الحلال.. كنت بوفر من قوت يومي علشان أجيب مفرش أو قطعة جهاز، وتعب سنين الشقى ضاع قدام عيني وأنا مش قادرة أعمل حاجة".
وتابعت العروس والحسرة تملأ وجهها: "عفشي كله بقى تراب، ومش عارفة هعمل إيه ولا هجيب منين تاني، كان نفسي أفرح زي أي بنت، لكن قدّر الله وما شاء فعل".
أخواتي بيساعدوني لكن شققهم ولعت
لم تتوقف المأساة عند جهاز العروس فحسب، بل امتدت لتشمل العائلة بأكملها، حيث قالت العروس: "إخواتي كانوا سندي، وكانوا بيساعدوني بكل اللي يقدروا عليه علشان يفرحوا بيا، لكن الكارثة إن الحريق مسبش حد في حاله، شقق إخواتي التلاتة كمان ولعت بكل اللي فيها، بقينا كلنا في الشارع ومفيش بيت نأوي إليه".
الأم المكلومة
ومن جانبها، قالت والدة العروس لـ "تليجراف مصر" والدموع تسبق كلماتها: "بنتي كان فرحها أول الشهر الجاي، ولسه مخلصين الكشف الطبي علشان نعقد القران، كنا بنرتب ليوم الفرح، لكن النار كانت أسرع مننا وسرقت فرحتنا".
وأضافت الأم: "مش بس جهاز بنتي اللي راح، شقق ولادي التلاتة اتحرقت بالكامل، مفيش لبس ولا غطا ولا حتى لقمة، ولادي ضاعوا وضاع شقاهم في الحريق ده، ومش عارفين هنبدأ منين ولا هنعمل إيه، إحنا مبقاش لينا غير ربنا".
اقرأ أيضا:
الدفاع المدني يكافح النيران.. حريق ضخم بمخزن أخشاب يمتد لعقارات مجاورة بمصر القديمة